Yeni Balakən qəzeti

0

25 aprel 2026-cı il tarixində Balakən rayonunun Hənifə kənd bələdiyyəsində Ümummilli lider Heydər Əliyevin anadan olmasının 103-cü ildönümünə həsr olunmuş şahmat üzrə həvəskarlar arasında rayon turniri baş tutdu.

Turnir Balakən Rayon İcra Hakimiyyəti, Şəki-Zaqatala Regional Gənclər və İdman İdarəsinin Balakən sektoru, Şəki-Zaqatala Regional Təhsil İdarəsinin Balakən sektoru, Balakən rayon Uşaq-Gənclər İdman Şahmat Məktəbi və Hənifə kənd bələdiyyəsinin birgə təşkilatçılığı ilə keçirildi.

Açılış mərasimində Balakən Rayon İcra Hakimiyyətinin Başçısı cənab Natiq Ağayev çıxış edərək Heydər Əliyevin Azərbaycan xalqının tarixində silinməz iz qoymuş böyük şəxsiyyət olduğunu vurğuladı. O, gənclərin intellektual inkişafına, sağlam rəqabətə və dostluq münasibətlərinə töhfə verən bu kimi yarışların əhəmiyyətini qeyd edərək iştirakçılara uğurlar arzuladı.

Turnirdə müxtəlif yaş qruplarından onlarla şahmatçı iştirak etdi və 4 nominasiya üzrə qaliblər müəyyənləşdi:

• Balacalar arasında
  🥇 Dibirov Elturan
  🥈 Dibirov Canpolad
  🥉 Əlibəşiyeva Aynur
• Gənclər arasında
  🥇 Mehdiyev Şəmsəddin
  🥈 Dibirov Şamil
  🥉 Qaysayev Rəşad
• Böyüklər arasında
  🥇 Alqayev Rəhman
  🥈 Musalimov Telman
  🥉 Musazadə Təbriz
• Gənc qızlar arasında
  🥇 Mehdiyeva Fidan
  🥈 Qunduzova Səma
  🥉 Alqayeva Səbinə

Qaliblər Şəki-Zaqatala Regional Gənclər və İdman İdarəsinin Balakən sektoru tərəfindən diplomlarla, Hənifə kənd bələdiyyəsi tərəfindən isə mükafatlarla təltif olundular.

Bu turniri Balakəndə şahmatın inkişafına, gənclərin intellektual bacarıqlarının artırılmasına və milli-mənəvi dəyərlərin təbliğinə mühüm töhfə kimi dəyərləndirmək olar.

Şahmat fiqurları taxtadan yığışdırılsa da, bu günün xatirəsi yaddaşlardan silinməyəcək. Çünki Balakən gəncləri onu da göstərdilər ki, zəka ilə qurulan hər bir gediş yalnız oyunda deyil, həyatda da qalibiyyət gətirir. Və bəlkə də bu turnirin ən böyük qələbəsi taxtada deyil, gənclərin ürəyində doğulan yeni ümidlərdə idi.

                                                                Yeni Balakən

0

Balakən rayonunda şəhidlərin əziz xatirəsinə həsr edilmiş voleybol üzrə bələdiyyə və təşkilatlar arasında rayon turnirinə start verilib. Yarış Balakən Rayon İcra Hakimiyyəti, Gənclər və İdman, Təhsil sektorları və Rayon Olimpiya İdman Kompleksinin birgə təşkilatçılığı ilə keçirilir.

Açılış mərasimində Balakən Rayon İcra Hakimiyyətinin başçısı Natiq Ağayev, aparat əməkdaşları, hüquq-mühafizə orqanlarının rəhbərləri, şəhid ailələri, qazilər və ictimaiyyət nümayəndələri iştirak ediblər. Tədbir Ulu Öndər Heydər Əliyevin və Vətən uğrunda canlarını fəda etmiş şəhidlərin xatirəsinin bir dəqiqəlik sükutla yad edilməsi və Azərbaycan Respublikasının Dövlət Himninin səsləndirilməsi ilə başlayıb.

Çıxışında Natiq Ağayev şəhidlərin və şəhid ailələrinin cəmiyyətimiz üçün ən ali dəyər olduğunu vurğulayıb, turnir iştirakçılarına uğurlar arzulayıb. Digər çıxış edənlər – Sarxan Hacıyev, şəhid valideynləri Aynur Bayramova və Şəmsəddin Tuhumov – şəhidlərin qəhrəmanlığının hər birimiz üçün örnək olduğunu, bu turnirin isə onların xatirəsinə olan sonsuz ehtiramın ifadəsi olduğunu bildiriblər.

Turnirin keçirilməsində məqsəd şəhidlərin xatirəsini yad etməklə yanaşı, gənc nəslə qəhrəmanlıq nümunəsini çatdırmaq, sağlam həyat tərzini təbliğ etmək, komanda ruhunu inkişaf etdirmək və iştirakçıların fiziki hazırlığını yüksəltməkdir.

Yarışda ümumilikdə 20 komanda mübarizə aparır. İlk oyun Qazma və Balakən bələdiyyələrinin komandaları arasında keçirilib və Qazma bələdiyyəsi qalib gəlib. Turnir 25 aprel 2026-cı il tarixində yekunlaşacaq.

Gərgin və maraqlı idman mübarizəsi şəraitində keçən oyunlar tamaşaçılar tərəfindən böyük maraqla qarşılanır. Bu turnir həm idman bayramı, həm də şəhidlərimizin ruhuna ehtiramın parlaq nümunəsi kimi yadda qalacaq.

                                                                             Yeni Balakən

0

Balakən şəhərinin Atatürk prospektində yerləşən şəhid ailələri və Qarabağ müharibəsi əlilləri üçün inşa edilmiş 36 mənzilli, həmçinin qaçqın və məcburi köçkünlərin məskunlaşdığı 45 mənzilli binalara rayon rəhbəri Natiq Ağayev baxış keçirib. Bu baxış sadəcə rəsmi səfər deyil – sakinlərin gündəlik həyatına, onların problemlərinə birbaşa toxunan, insani ünsiyyətə əsaslanan görüş idi.

Sakinlərin Səsi Dinlənildi

Görüş zamanı sakinlər su, kanalizasiya, zibil qutuları, sahibsiz itlər, qaz, elektrik, istilik və işsizlik kimi gündəlik problemlərini səsləndirdilər. Natiq Ağayev bir sıra məsələlərin həlli üçün yerindəcə göstəriş verdi, digərlərinin isə zamana ehtiyac olduğunu bildirdi. Bu yanaşma sakinlərdə ümid və inam yaratdı.

Sakinlər rayon rəhbərinin səmimiyyətini, insani davranışını yüksək qiymətləndirdilər. Onların sözlərinə görə, bu cür ünsiyyət dövlətə olan sevgini gücləndirir, inamı möhkəmləndirir. Bina sakini Vüsalə xanım isə cənab Prezidentə minnətdarlığını dilə gətirərək dedi:
“Sağ olsun cənab Prezident, evsiz, körpə övladımla küçədə qalmışdım. Dövlət başçısı mənə ev, isti yuva verdi.”

Bu sözlər bir anlıq görüşün deyil, illərlə çəkilən çətinliklərin arxasında dayanan böyük bir sevincin ifadəsi idi.

İdarəetmədə İnsani Yanaşma

Natiq Ağayevin idarəetmə təcrübəsi, geniş təfəkkürü və dövlətçilik tərbiyəsindən gələn davranış tərzi sakinlər tərəfindən xüsusi vurğulandı. Onun tam heyətlə gəlməsi, hər bir sakinin sözünü dinləməsi, problemlərə diqqətlə yanaşması insanların gözündə rəhbərin sadəcə məmur deyil, həm də bir ailə üzvü kimi görünməsinə səbəb oldu.

Sakinlərin Razılığı

Sakinlər görüşün sonunda Natiq müəllimə təşəkkürlərini bildirərək, göstərilən diqqət və qayğıdan razı qaldıqlarını vurğuladılar. Onların sözlərinə görə, bu cür görüşlər təkcə problemlərin həlli üçün deyil, həm də dövlət-vətəndaş münasibətlərinin möhkəmlənməsi üçün mühüm addımdır.

Bu görüşün bəxş etdiyi xoş  təəssüratlardan biri də odur ki, dövlətin gücü yalnız qurulan binalarda, çəkilən yollarda deyil, vətəndaşın qəlbindədir. Şəhid ailələri, müharibə əlilləri, qaçqın və məcburi köçkünlər üçün yaradılan şərait onların həyatına rahatlıq gətirməklə yanaşı, dövlət-vətəndaş birliyini daha da möhkəmləndirir. Sakinlərin minnətdarlığı isə göstərir ki, bu birlik gələcəyə olan ümidlərin ən güclü təminatıdır.

                                                                            Ramazan Abal

1

Balakəndə Şəhid Ailələrinə Ziyarət

Vətən müharibəsi yalnız torpaqlarımızın azadlığı deyil, həm də xalqımızın ruhunun ucalığı idi. Bu müharibədə şəhid olan igidlərimiz öz qanları ilə qəhrəmanlıq səlnaməsi yazdılar. Onların igidliyi dost üçün fəxarət, düşmən üçün qorxu və titrətmədir. Şəhidlərimizin ruhu daim uca tutulur, ailələri isə dövlətin diqqət və qayğısı ilə əhatə olunur.

Balakən rayonunun icra başçısı Natiq Ağayev təyin olunduğu gündən şəhid ailələrinin yanında olmağı özünün ən müqəddəs borcu sayır. Onun hər bir ziyarəti dövlətin böyüklüyünü, xalqın minnətdarlığını ifadə edir. Şəhid ailələrinin evlərinə qədəm basan icra başçısı onların dərdini dinləyir, problemlərinə çarə tapır, qayğılarını bölüşür. Bu görüşlərdə onu adətən DİN Balakən Polis Şöbəsinin və DTX Balakən rayon şöbəsinin rəhbərləri müşayiət edirlər.

Şəhid ailələri bu diqqət və qayğıdan qürur duyur, ölkə rəhbəri Cənab İlham Əliyevə yerdə onun nümayəndəsi Natiq Ağayev vasitəsilə minnətdarlıqlarını bildirirlər. Natiq müəllim səmimiyyəti, insana sayğısı və diqqətcilliyi ilə dövlətin ideal simasını təcəssüm etdirir – arxa-dayaq, haqq-ədalət və son ümid.

İcra başçısının ilk ziyarəti Vətən Müharibəsi Qəhrəmanı Amin Novruzovun ailəsinə oldu. Ardınca əfsanəvi kəşfiyyatçı “Türk Harun” ləqəbli Harun Alqayevin ailəsi, daha sonra iki ayın əsgəri olaraq şəhid olmuş Murtuzov Məhəmmədin Xalatala kəndindəki ailəsi ziyarət edildi. Bu günün görüşü isə “Vur komandir, vur” kəlamı ilə bütün türk dünyasında tanınan qəhrəman tank komandiri Vahid Əlisoltanovun ailəsində baş tutdu.

Bu evlərdə şəhidlərin otaqları bir növ muzeyə çevrilib. Hər bir şəkil, hər bir əşya onların döyüş yolunun canlı şahididir. İcra başçısı bu otaqlarda şəhidlərin ruhu ilə söhbət edir, onların keçdiyi şərəfli yolu yüksək qiymətləndirir, valideynlərinə həm maddi, həm də mənəvi dəstək olur.

Balakənin bütün şəhid ailələrinin öz doğma adamı,ailə üzvi kimi bildikləri Balakən polis şöbəsinin rəisi Çingiz Aslanov da hər görüşdə şəhid ailələrinə sevinc bəxş edir. Onun gətirdiyi hədiyyələr sadəcə bir əşya deyil, bir sevinc, bir ümid, bir diqqət nişanəsidir. Bu qayğı ilə ailələr özlərini tək hiss etmir, dövlətin nəfəsini yanlarında duyurlar.

Balakəndə şəhid ailələrinin ziyarəti yeni başlayıb və mütəmadi olaraq davam edəcək. Bu görüşlər bir daha onu göstərir ki, şəhidlərimizin ruhu daim uca tutulur, onların ailələri isə dövlətin və xalqın diqqət və qayğısı ilə əhatə olunur. Şəhidlərimizin qəhrəmanlıq dastanı gələcək nəsillərə örnək olacaq, onların igidlik səlnaməsi heç vaxt unudulmayacaq.

                                                     Yeni Balakən

1

15 aprel – Dünya İncəsənət Günü münasibətilə Balakən rayonunda möhtəşəm bayram konserti təşkil olunub. Tədbir Mədəniyyət Mərkəzinin təşəbbüsü ilə rayon Mədəniyyət və İstirahət parkında baş tutub.

Konserti giriş sözü ilə açan Mədəniyyət Mərkəzinin direktoru Arzu Ocaxverdiyev iştirakçıları salamlayaraq bu əlamətdar gün münasibətilə təbrik edib, incəsənətin insan ruhunu zənginləşdirən və milli kimliyi yaşadan önəmindən danışıb.

Bayram konsertinin bədii hissəsində Balakən rayon Mədəniyyət Mərkəzinin kollektivi, “Cahan” avar xalq kollektivi, “Qönçələr” və “Qubek” rəqs qrupları səhnəyə çıxaraq rəngarəng proqram təqdim ediblər. Müğənnilərin ifasında səslənən musiqi nömrələri tamaşaçılara bayram ovqatı bəxş edib.

Tədbir iştirakçılar tərəfindən böyük maraqla izlənilib və alqışlarla qarşılanıb. Dünya İncəsənət Günündə keçirilən bu konsert Balakən ictimaiyyətinin mədəni həyatında yaddaqalan bir gün kimi yadda qalıb.

                                 Yeni Balakən

0

Balakəndə mediasiya mədəniyyətinin formalaşmasına mühüm töhfə

Son illərdə Azərbaycanda hüquqi mübahisələrin alternativ həlli mexanizmlərinə maraq əhəmiyyətli dərəcədə artmışdır. Bu istiqamətdə mediasiya institutu müasir hüquqi sistemin vacib elementlərindən biri kimi çıxış edir. Mediasiya tərəflər arasında yaranan mübahisələrin məhkəməyə müraciət edilmədən, qarşılıqlı razılıq və anlaşma əsasında həllinə imkan yaradır.

Ölkəmizdə mediasiyanın tətbiqi və inkişafı dövlət siyasətinin prioritet istiqamətlərindəndir. Bu sahənin formalaşması və inkişafı İlham Əliyev tərəfindən imzalanmış sərəncamlar və qəbul edilən normativ-hüquqi aktlar nəticəsində mümkün olmuşdur. Bu addımlar mediasiyanın hüquqi əsaslarını möhkəmləndirmiş və onun geniş tətbiqinə şərait yaratmışdır.

Mediasiya sahəsində fəaliyyətin koordinasiyası və inkişafında Azərbaycan Respublikasının Mediasiya Şurası xüsusi rol oynayır. Şuranın İdarə Heyətinin sədri Nadir Adılov bu sahədə sistemli islahatların həyata keçirilməsi, mediatorların peşəkarlıq səviyyəsinin artırılması və beynəlxalq təcrübənin tətbiqi istiqamətində mühüm fəaliyyət göstərir.

Regionlarda fəaliyyət göstərən mediasiya qurumları bu siyasətin real nəticələrini nümayiş etdirir. Bu baxımdan Balakən 1 saylı Mediasiya Təşkilatı xüsusi qeyd olunmalıdır. Təşkilat yerli əhali üçün mediasiya xidmətlərinin əlçatanlığını təmin edir, hüquqi maarifləndirmə tədbirləri həyata keçirir və mübahisələrin sülh yolu ilə həllinə töhfə verir.

Təşkilatda çalışan mediatorlar hər bir müraciətə fərdi yanaşaraq tərəflər arasında dialoqun qurulmasına və qarşılıqlı etimadın bərpasına nail olurlar. Xüsusilə ailə, əmək və kommersiya mübahisələrinin mediasiya yolu ilə həlli həm vaxt, həm də maliyyə baxımından daha səmərəli nəticələr verir.

Qeyd edilməlidir ki, Balakən 1 saylı Mediasiya Təşkilatının direktoru və mediatoru Nizamə İsmayılova rəhbərlik etdiyi kollektivlə birlikdə regionda mediasiya mədəniyyətinin inkişafına dair bir çox işlər görür,mühüm addımlar atır. Onun təşəbbüskarlığı və peşəkarlığı nəticəsində təşkilatın fəaliyyəti daha da genişlənməkdədir.

Nəticə etibarilə, mediasiya Azərbaycanda hüquqi sistemin ayrılmaz hissəsinə çevrilməkdədir. Dövlət dəstəyi, institusional inkişaf və peşəkar mediatorların fəaliyyəti bu sahənin gələcəkdə daha da genişlənəcəyini və cəmiyyət üçün effektiv alternativ həll mexanizmi kimi mövqeyini möhkəmləndirəcəyini göstərir.

                                                                            Yeni Balakən

P.S. Vətəndaşların nəzərinə:Bir sıra məsələlərdə məhkəməyə baş vurunca əvvəl Balakən 1 saylı Mediasiya Təşkilatı ilə görüşün.Bəlkə uzun-uzadı məhkəmə proseslərinə,çəkişmələrə ehtiyacınız olmayacaq,təşkilatın köməyi sayəsində məsələ qısa yoldan,tez zamanda həllini tapa bilər.Təşkilatın iş həyatı bu cürə müsbət nəticələnən işlərlə zəngindir.İki ay sonra təşkilatın yaranmasının ildönümüdür.İldönümü ilə əlaqədar geniş yazımızda təşkilatın fəaliyyəti,gördüyü işlər barədə geniş məlumat verəcəyik.

0

15 aprel 2026-cı il tarixində Balakən Rayon İcra Hakimiyyətinin inzibati binasında vətəndaşların növbəti qəbulu təşkil olunub. Qəbulda rayon icra hakimiyyətinin başçısı, Aparatın şöbə müdirləri, aidiyyəti idarə, müəssisə və təşkilatların nümayəndələri iştirak ediblər.

Qəbul zamanı vətəndaşların müraciətləri dinlənilib, onların qaldırdıqları məsələlərlə bağlı qanunvericiliyin tələbləri izah olunub. Rayon icra hakimiyyətinin səlahiyyətləri daxilində olan problemlərin həlli üçün yerində tapşırıqlar verilib. Digər mövzularla bağlı isə aidiyyəti dövlət qurumlarının yerli nümayəndələrinə tövsiyələr çatdırılıb.

Qəbulda şəhid ailələri, qazilər və müharibə iştirakçıları növbədənkənar qəbul edilərək onların müraciətlərinə xüsusi diqqət göstərilib. Bu, dövlətin müharibə iştirakçılarına və şəhid ailələrinə göstərdiyi qayğının bariz nümunəsi kimi dəyərləndirilib.

Belə görüşlər vətəndaşların problemlərinin birbaşa dinlənilməsi, onların operativ həllinə şərait yaradılması və dövlət-vətəndaş münasibətlərinin möhkəmləndirilməsi baxımından mühüm əhəmiyyət kəsb edir.

                                                                Yeni Balakən

0

Balakən – gözəl memarlığın və düzgün şəhərsalmanın nümunəsi olsun.
Cənab Prezidentin sərəncamı ilə 2026-cı il ölkəmizdə “Şəhərsalma və Memarlıq” ili elan olunub. “Yeni Balakən” qəzeti olaraq biz də bu mühüm təşəbbüsə dəstək verməyi özümüzə borc bilirik. Çünki ev tikmək, bir yuvaya sahib olmaq hər bir insanın ən böyük arzularından biridir.
Lakin çoxları bilmədən inşaata başlayır və sonradan müxtəlif çətinliklərlə üzləşir. Əslində isə ilk addım layihələndirmədir: tikiləcək evin memarlıq planı hazırlanmalı, müvafiq sənədlər Şəhərsalma və Arxitektura Komitəsinə elektron qaydada təqdim edilməlidir. Komitə 10 iş günü ərzində layihəni yoxlayır və qanunlara uyğun olduğu halda portalda qeydiyyata alır. Bu qeydiyyat tikintinin rəsmi statusunu təsdiqləyir və sizi cərimələrdən, narahatlıqlardan qoruyur.
Tikinti tamamlandıqdan sonra portalda “tamamlama” qeydiyyatı aparılır. Bununla evinizə qaz xətti çəkilir, çıxarış verilir. Qeyri-yaşayış obyektləri – mağaza, anbar, dükan – üçün də eyni qaydalar keçərlidir. Əks halda, cərimələr ard-arda artır: əvvəl 300 manat, sonra 500, daha sonra minlərlə manat… Halbuki, qanuna uyğun sənədləşmə ilə bütün bu problemlərin qarşısını almaq mümkündür.
Biz “Yeni Balakən” olaraq oxucularımıza həm məlumatlandırma, həm də sənədlərin sistemə yerləşdirilməsi sahəsində dəstək göstəririk. İstər fərdi yaşayış evi, istər yardımçı tikili, istərsə də ticarət obyekti olsun – rayonumuzda fəaliyyət göstərən gənc və savadlı memarlar, peşəkar layihə və dizayn şirkətləri ilə sizi əlaqələndirə bilərik. Üstəlik, sərfəli qiymətlərlə və tam rəsmi qaydada.
Nəticə olaraq, “Şəhərsalma və Memarlıq” ili hər birimiz üçün yalnız dövlət proqramı deyil, həm də öz həyatımızı daha rahat, qanunlara uyğun qurmaq fürsətidir. Ev tikmək, obyekt inşa etmək – bunlar sadəcə daşdan, taxtadan ibarət deyil, həm də gələcəyimizin təminatıdır. Qanunlara riayət etməklə, düzgün layihələndirmə və rəsmi qeydiyyatla hər bir tikinti həm sahibinə rahatlıq, həm də cəmiyyətə gözəllik bəxş edir.
Balakənlilər olaraq biz də bu prosesdə həm dövlətimizin çağırışına cavab verməli, həm də öz yuvamızı, iş yerimizi qanuni və möhkəm əsaslarla qurmalıyıq. Çünki hər bir sağlam tikili – sağlam gələcəyin təməlidir.

Yeni Balakən

0

30 mart 2026-cı il tarixində Balakən Rayon Şəhidlər Xiyabanında itkin şəhidimiz Həsənov Cavanşir İsrafil oğlunun 40 mərasimi keçirilib. Tədbirdə Balakən Rayon İcra Hakimiyyətinin başçısı Natiq Ağayev, rayonun hüquq-mühafizə orqanlarının rəhbərləri, şəhid ailələri, qazilər, şəhidimizin yaxınları və ictimaiyyət nümayəndələri iştirak ediblər.

Şəhid Cavanşir Həsənov 1992-ci ildə Ağdərə istiqamətində gedən döyüşlərdə itkin düşmüş, onun nəşi uzun illərdən sonra – 19 fevral 2026-cı ildə Əsir və itkin düşmüş girov götürülmüş vətəndaşlarla əlaqədar Dövlət Komissiyasının təşkilatçılığı ilə tapılaraq ailəsinə təhvil verilib və doğulduğu Balakən rayonunda Şəhidlər Xiyabanında dəfn olunub.

Mərasimdə şəhidin döyüş yolundan, Müzəffər Ali Baş Komandanın rəhbərliyi ilə Vətən Müharibəsi və Anti-terror əməliyyatı zamanı qazanılmış qələbələrdən, işğaldan azad edilmiş ərazilərdə itkin düşmüş şəxslərin nəşlərinin tapılaraq ailələrinə təhvil verilməsindən və dövlətimizin bugünkü uğurlarından söz açılıb.

Şəhidin məzarı önünə gül dəstələri düzülüb, ruhuna dualar oxunub. Şəhidin ailə üzvləri göstərilən diqqət və qayğıya görə dövlət başçısı cənab İlham Əliyevə və Azərbaycan Respublikasının Birinci vitse-prezidenti Mehriban xanım Əliyevaya dərin minnətdarlıqlarını bildiriblər.

Allah bütün şəhidlərimizə rəhmət eləsin!

                                                             Yeni Balakən

Bir ölkənin ən böyük sərvəti onun insanıdır. Bu sərvətin formalaşmasında bölgələrimizin rolu danılmazdır. Balakən və balakənlilər bu baxımdan xüsusi yer tutur. Tarix boyu dövlətə sədaqəti ilə tanınan, dövlətçiliyimizi yaşadan oğullarımız və qızlarımız olmuşdur, bu gün də var, gələcəkdə də olacaq. Ən önəmlisi isə bu insanlara sağlığında dəyər vermək, diqqət göstərməkdir.
Balakənin Qəhrəmanları
• Mehdiyev İlham İsmayıl oğlu – Vətən Müharibəsi Qəhrəmanı
• Qebedov Elnur Ceerov oğlu – Vətən Müharibəsi Qəhrəmanı
• Hudulov Ramazan İzzət oğlu – Vətən Müharibəsi Qəhrəmanı
• Əliyev Fərid Vaqif oğlu – Vətən Müharibəsi Qəhrəmanı
• Novruzov Amin Tacəddin oğlu – (ölümündən sonra)Vətən Müharibəsi Qəhrəmanı

Bu qəhrəmanlarımız dövlətimizin müstəqilliyi və təhlükəsizliyi uğrunda böyük fədakarlıqlar göstərmişlər.
Balakənin Tanınmış Şəxsiyyətləri
Balakən rayonundan çıxmış, ölkənin müxtəlif sahələrində fəaliyyət göstərən, yüksək vəzifələr tutan, bayrağımızı ucaldan, ad-san qazanmış insanlar çoxdur:
• Nəsib Məhəməliyev – Millət vəkili
• Qoşqar Səlimov – Prezident Administrasiyasında
• Əhmədov Emil Yaşar oğlu-Taylandda Azərbaycan səfirliyi,konsul
• Məmmədov Nazim Şahruddin oğlu-BMT-nin regional ofisində BMT İnkişaf Proqramının Asiya və Sakit okean regionu üzrə enerji məsələlərində rəhbər (Bangkok,Tailand)
• Zamir Dibirov – İqtisadiyyat Nazirliyində,nazir müavini
• Aydın İsayev – Maliyyə Nazirliyində
• General-mayor Canpolad Daanov – Polis Akademiyasının rəisi
• General-mayor Nurullah Məmmədxanlı – DİN Baş Mühafizə İdarəsinin rəisi
• General-mayor Bilal Çompuzov – Azərbaycan Ordusunun korpus komandiri
• Muradov Səməd Əli oğlu-Müdafiə Nazirliyində
• Rəsul Çunayev – Dünya çempionu
• Laləzar Mustafayeva-Azərbaycan Respublikasının xalq artisti
• Füzuli İsmət oğlu Hüseynov-Azərbaycan Respublikasının əməkdar artisti.
• Nailə İslamzadə – Azərbaycan Respublikasının əməkdar artisti.
• Kamran Yunis-teatr və kino aktyoru, rejissor, bədii qiraət ustası
• Leyla Atayeva-Pantomima Teatrının istedadlı gənc aktrisası
• Osman Gündüz – Azərbaycan İnternet Fondunun Prezidenti
• Rəvan Əliyev – BDU-nun doktorantı
• Məmmədli Akif Əlavəddin oğlu-Tarix üzrə fəlsəfə doktoru
• Ruslan Herayev – ARB televiziyasının informasiya şöbəsinin müdiri
• Elnur Şibliyev – ARB 24-ün icraçı direktoru
• Nuranə İbrahimli – Aparıcı
• Əfsanə Rəcəb- gənc xanım jurnalistimiz
• Zeynal Əmrəliyev-Politoloq
• Rasim Əmrəliyev – “LUKOİL” şirkətinin Azərbaycan və Gürcüstan nümayəndəliyinin rəhbəri
• Qasımova Samirə-Dünya Bankı, Amerika
• Puçaxov Nurlan-London Maliyyə Bankı-İngiltərə
• Zaur Fazil oğlu Yaqubov-Suraxanı Maşın Zavodunun direktoru
• Nəsibov Şaban -Çikaqo,Amerika
• Abdullayev Nürəddin-Texas,Amerika
• Ərbəşiyev Elnur-Kanada
• Gallacov Nurlan-İrlandiya
• Xoçberov Natiq -Birləşmiş Ərəb Əmirlikləri
• Qurbanov Rəsul-Latviya
• Qurbanov Şamil -həkim,Almaniya
• Abbasov Nihat – həkim,Moskva Rusiya
Bu şəxslər tanınmış şəxslərimizin çox az hissəsidir,onlar öz sahələrində uğur qazanaraq həm rayonumuzun, həm də ölkəmizin adını ucaldırlar.
İctimai Həyatda İştirakın Əhəmiyyəti
Belə tanınmış insanların rayonumuzda təşkil olunan kütləvi tədbirlərə, bayram şənliklərinə, toplantılara dəvət olunması çox önəmlidir. Bayram günləri qeyri-iş günləri olduğundan onların böyük əksəriyyəti evdə olur, bəziləri isə doğma Balakəndə bayramı keçirirlər. Böyük məmnuniyyətlə bu tədbirlərdə iştirak edər, rayonumuza şərəf verərlər.
Strateji Baxış
İdarəetmənin strateji planlamasında “çevrədən faydalanma, fürsətləri dəyərləndirmə” anlayışı mövcuddur. Respublika miqyasında fayda verən bu hörmətli insanların rayonumuzun ictimai, siyasi və mədəni həyatında iştirakı Balakənə böyük xeyir gətirər. Onların təcrübəsi, nüfuzu və dəstəyi ilə biz birlikdə daha güclü ola bilərik.
____________________________________________________________________
Balakənin fəxrləri bizim üçün yalnız qürur mənbəyi deyil, həm də gələcək inkişafımızın təminatıdır. Onlara dəyər vermək, rayon həyatına cəlb etmək hər birimizin borcudur.
==========================================
P.S.Adlarını siyahıda qürurla,fəxrlə qeyd etdiyim dəyərli Balakənlilərim,sizlərdən kiçicik bir xahişim var-Balakənə gəldiyiniz zaman “Yeni Balakən” qəzetinin redaksiyasında(Balakən İcra Hakimiyyəti binasının birinci mərtəbəsində) mən redaktor Ramazan Abalov, Balakən Rayon İcra Hakimiyyətinin Başçısı Natiq Ağayev,Balakən RİH-in başçısının birinci müavini Turan Dibirov sizləri məkanımızda qarşılamaqdan, sizlərlə görüşməkdən məmnunluq duyarıq.Qapımız üzünüzə açıqdır.Balakənə gəldiyinizdə mütləq görüşək,sizləri görmək xoşdur.

                                                                                                                        Ramazan Abal